Фотографска изложба во Скопје 

Лицето на човековите права

“Лицето на човековите права не е еден човек, не е една жена, не е ед­но дете ниту една нација - тоа сме си­­те ние”.

Со овие зборови беше анимирана јав­носта да ја посети изложбата на фотографии којашто во Музејот на град Скопје беше отворена на 12-ти и траеше до 26 октомври. 

“Фотографијата како уметничка фор­ма на човековото изразување често па­ти успева да ги дефинира и идентификува различните аспекти од човековите права. Добрите фотографии кажуваат многу повеќе отколку еден говор и ретко кога им е потребна интерпретација. Оваа из­лож­ба ги портретира човековите пра­­­ва преку селектираните фотогра­фии од агенцијата Магнум фотос од Париз. Тие не само што го отсликува­ат кршењето на човековите права, ту­ку исто така ја документираат реалноста на животот во мир и достоинство”, стоеше во пригодниот текст на изложбата, чиј мотив е по­чи­ту­ва­ње на човековите права, воспоставување мир, демократија и одржлив раз­­вој.

Изложбата за првпат настанала по прис­тапувањето на Швајцарија во Обе­динетите нации, кога Сојузното министерство за надворешни работи ја претставило под нас­­лов “Постоење” во Палатата на нациите во Женева, за да го одбе­ле­жи отворањето на 60-тото заседание на Комисијата за човекови права на Обединетите нации. Како резултат на покажаниот интерес, започнала и патувачката турнеја низ швајцарските претставништва и канцеларии за соработка во странство.

По­­крај изложбата на фотографии во Му­зејот на град Скопје,  секојдневно се одржуваа проекции на филмови коишто преку својата визуелна форма изразуваат одредени човекови пра­ва. Проектот е поддржан од Швај­цар­ската амбасада во Република Ма­ке­­донија, овозможен од Магнум фотос, во организација на Музејот на град Скопје во соработка со Публицис Скопје, со Хелсиншкиот комитет за човекови права, со ОХЦХР, со УНИЦЕФ, со УНХЦР  и  со МАССО.                              

 К.Б.